Kraftaverk í Búlgaríu

Heyrði þessa sögu frá vinkonu minni sem býr í Búlgaríu.

Fyrir sirka þremur vikum síðan var maður í Aðvent kirkjunni í Búlgaríu að keyra Evu, 13. ára dóttur sinni og vinkonu hennar heim. Eva sést á myndinni hérna til hægri.  Þegar hann var að keyra þá missti hann meðvitund og ók út af og beint á tré. Vinkonan var sofandi í bílnum og hún slapp við meiðsl en maðurinn og dóttir hans misstu meðvitund. Í heilar tvær vikur var Eva meðvitundarlaus á borgarspítalanum í Dobrich og ástand hennar mjög alvarlegt. Heilarit sýndi enga virkni heilans og læknarnir sögðu litlar líkur á að hún myndi lifa af.

Móðir Evu bað um kraftaverk og bað fólk í kirkjum Búlgaríu að sameinast í bæn þar sem beðið væri fyrir kraftaverki. Ákveðið varð halda bænastundina 5. nóvember, klukkan ellefu. Þegar stundin rennur upp þá situr móðirin við rúm Evu og verður vitni að kraftaverki, Eva fær meðvitund og biður um að fá eitthvað að borða. 

Það er engin spurning að Guð heyrir enn bænir og gerir kraftaverk á okkar tímum eins og á tímum Biblíunnar.

Athugasemdir

[Tómas, 15.11.2011 kl. 21:25]

Hefði þó ekki verið fallegra af guði að láta manninn halda meðvitund (var guð eitthvað fúll eftir messuna í kirkjunni kannski?) eða þá láta bílinn ekki lenda beint á tré, heldur bara út í haga?

Nei, ég skil hvorki upp né niður í því hvernig þér finnst þetta vera saga um gæsku og kraftaverkasvörun guðs. Það hefur margoft verið sannreynt (vísindalega jafnvel) að bænir hafa engin áhrif.

Það er sum sé spurning hvort einhver bænheyri okkur og geri kraftaverk.

[Mofi, 15.11.2011 kl. 22:21]

Tómas, málið er ekki að Guð passi að ekkert komi fyrir okkur hérna, að okkar líf hérna sé einhver dans á rósum.  Þú skilur ekki af hverju þegar einhver er í dái og dauðvona og fólk biður Guð um lækningu og viðkomandi læknast að fólk sjái það sem bænheyrslu?  Allt í lagi... þú vonandi fyrirgefur þó ég skilji ekki hvernig þú getur séð það þannig. Þarna sá þetta fólk bænina hafa áhrif svo fyrir þetta fólk var það raunverulegt, sama þótt einhverjir vilji meina að það hafi ekki verið vísindalegt.

[Mofi, 16.11.2011 kl. 11:07]

Vinkona mín sem sagði mér fréttina vildi benda mér á að heilarit sýndi ekki starfsemi í heilanum þegar Eva var í dái. Gerir þetta ennþá magnaðra.

Eins og ég sé þetta þá hefur Guð sleppt sinni verndarhendi og stjórn af þessum heimi. Þessi heimur fer sína eigin leið og hið vonda eða heimska eða óheppna sem við gerum, við finnum afleiðingar þess. Sömuleiðis fær náttúran að leika lausum hala. Allt þetta er svona á meðan deilan milli góðs og ills er í gangi. Áður en Guð dæmir heiminn og hið vonda í honum þá verður það að fá að sýna sitt rétta andlit þannig að þegar Guð grípur inn í þá mun öllum verða það ljóst að það var hið kærleiksríka og réttláta.  Af og til grípur Guð inn í aðstæður okkar eins og þetta dæmi í Búlgaríu og gerir kraftaverk, af hverju stundum en ekki alltaf er eitthvað sem aðeins Guð veit.

[Rebekka, 16.11.2011 kl. 12:01]

Mofi, myndir þú líka trúa svipaðri sögu ef að múslimi segði þér hana og fullyrti að Allah hefði gert kraftaverk?

Þarf ekki einu sinni að vera Allah, bara hvaða annar guð sem er en sá sem þú trúir á...

Annars minna svona sögur + afsökunin að "vegir Guðs séu órannsakanlegir" mig alltaf á myndina frægu af sveltandi, uppgefnu og yfirgefnu barni í Afríku með hrægamm í seilingarfjarlægð sem bíður færis að fá sér í gogginn.  Aðeins Guð veit hvaða áætlun hann hefur fyrir hrægamminn...

Sorrí, en ég hef ekki áhuga á Guði sem gerir það ömurlegar áætlanir að það kosti fjöldamörg saklaus mannslíf að framkvæma þær.

Btw, ef þú svarar þessu mátulega bitra innleggi mínu, þá vil ég biðja þig að svara allavega fyrstu spurningunni minni, en ekki bara skamma mig fyrir að vera "reið út í Guð".

[Mofi, 16.11.2011 kl. 13:47]

Rebekka, já, ég myndi trúa því. Ekki að Allah sé til, eða sá guð sem Múhammeð lýsir í Kóraninum en að Guð Biblíunnar myndi gera kraftaverk meðal fólks sem þekkir Hann ekki, já.

Varðandi hitt þá langar mig að benda þér á fyrsta kaflann í bók sem ég held upp á sem útskýrir þetta sem þú bendir á, sjá: Ættfeður og spámenn - Hvers vegna var syndin leyfð?

[Jón Ragnarsson, 17.11.2011 kl. 12:57]

Ef almáttugur guð er til, þá er viðkomandi eitt almesta illmenni í veraldarsögunni.

[Mofi, 17.11.2011 kl. 14:19]

Af hverju Jón?

[Karl Jóhann Guðnason, 17.11.2011 kl. 17:00]

Mögnuð saga.  Sumt er ekki hægt að útskýra nema sem eitthvað yfirnáttúrulegt eins og þetta.

Ég held líka til að útskýra hvers vegna er heimurinn er svona í dag er hinn frjálsi vilji mannsins og hvernig Guð virðir þann vilja.  Ef einhver vill ekki fylgja Guði (því góða) þá leyfir Guð það og þær afleiðingar sem því fylgir. Guð notar aldrei vald til að þvínga fólk, stöku sinnum grípur hann inn í eins og t.d. með Nóaflóðið, stofnun Ísraelsríkis eins og sagt er frá í Gamla testamentinu.  Og væntanlega við dómsdag í framtíðinni.  Þessi inngrip eru oft þegar hlutirnir eru alveg komnir á ystu nöf, og nauðsynlegt að grípa inn í atburðarásina.

Hinn frjálsi vilji er eitthvað sem er í okkar mannanna valdi til að nota, til góðs eða ills.

[Mofi, 18.11.2011 kl. 09:56]

Hjartanlega sammála Karl. Það er eins og margir flokki kraftaverk og Guð sem það sem er algjörlega bannað að vísa til, frekar að skrá sig á geðsjúkrarhús en að samþykkja kraftaverk Guðs. Þá upplifi ég hegðun viðkomandi þannig að andstaðan við Guð er svo mikil að rökréttu ályktuninni er hafnað alveg fram í rauðan dauðan. Guð virðir þetta val fólks en okkur ber að reyna að koma vitinu fyrir þeim.

[Hjalti Rúnar Ómarsson, 18.11.2011 kl. 10:23]

Já, Mofi. Kona lendir í slysi, slasast alvarlega, en lifir af. Ótrúlegt kraftaverk! Minnir mann bara á kraftaverkin í Gamla testamentinu, eins og þegar guð stöðvaði sólina! 

Ef einhver vill ekki fylgja Guði (því góða) þá leyfir Guð það og þær afleiðingar sem því fylgir.

Gætirðu útskýrt hvernig náttúruhamfarir og hinar ýmsu örverur sem drepa fólk eru "afleiðingar" af því að "fylgja" ekki guðinum þínum?

Guð notar aldrei vald til að þvínga fólk, stöku sinnum grípur hann inn í eins og t.d. með Nóaflóðið, stofnun Ísraelsríkis eins og sagt er frá í Gamla testamentinu.

Ah...guðinn þinn notar aldrei vald, nema þegar hann gerir það! Svo virðast sum inngripin vera einmitt til þess gerð að gera ástandið verra, eins og t.d. þegar guðinn þinn á að hafa hert hjarta faraós.

[Mofi, 18.11.2011 kl. 10:48]

Hjalti
Já, Mofi. Kona lendir í slysi, slasast alvarlega, en lifir af. Ótrúlegt kraftaverk! Minnir mann bara á kraftaverkin í Gamla testamentinu, eins og þegar guð stöðvaði sólina!

Ég lýsti þessu ekki þannig.

Hjalti
Gætirðu útskýrt hvernig náttúruhamfarir og hinar ýmsu örverur sem drepa fólk eru "afleiðingar" af því að "fylgja" ekki guðinum þínum

Sumt er þannig að maður er að upplifa afleiðingar sinna eigin gjörða, annað er þannig að maður er upplifa afleiðingar annara manna og stundum einfaldlega óheppni í náttúrunni eins og það sem gerðist þarna í Búlgaríu.

[Karl Jóhann Guðnason, 18.11.2011 kl. 22:05]

Hjalti: Gætirðu útskýrt hvernig náttúruhamfarir og hinar ýmsu örverur sem drepa fólk eru "afleiðingar" af því að "fylgja" ekki guðinum þínum?

Sú mynd sem Biblían gefur er að syndin kom inn í fullkominn heim og þar með brenglaðist allt. Og heimurinn komst einnig á vald hins illa. Svo við erum að sjá þær afleiðingar í dag. Guð er ekki orsök það sem illa fer, en hann hins vegar leyfir það.  Það rignir yfir réttláta og rangláta en það eru viss loforð um að þeir sem trúa á hann verði verndaðir, ef þeir hlýða hans reglum í lífinu.

Hjalti: Ah...guðinn þinn notar aldrei vald, nema þegar hann gerir það! Svo virðast sum inngripin vera einmitt til þess gerð að gera ástandið verra, eins og t.d. þegar guðinn þinn á að hafa hert hjarta faraós.

 Líklega er hægt að skilja þetta á þá vegu að Guð hafi leyft Faraó að herða hjarta hans. 

[Hjalti Rúnar Ómarsson, 19.11.2011 kl. 12:48]

Mofi: 

Ég lýsti þessu ekki þannig.

Mofi, punkturinn minn var sá að guðinn þinn virðist ekki lengur framkvæma kraftaverk sem eru aðgreinanleg frá venjulegum atburðum.

Sumt er þannig að maður er að upplifa afleiðingar sinna eigin gjörða, annað er þannig að maður er upplifa afleiðingar annara manna og stundum einfaldlega óheppni í náttúrunni eins og það sem gerðist þarna í Búlgaríu.

Óheppni í náttúrunni? 

Hvernig í ósköpunum eiga örverur og jarðskjálftar að vera "afleiðingar annarra manna"?

Karl:

Sú mynd sem Biblían gefur er að syndin kom inn í fullkominn heim og þar með brenglaðist allt.

Og þar með brenglaðist allt? Þannig að Adam og Eva óhlýðnuðust guði og vegna þessa urðu til jarðskjálftar og sýklar? 

 Líklega er hægt að skilja þetta á þá vegu að Guð hafi leyft Faraó að herða hjarta hans.

Líklega ekki. Hlustum á hvað Páll postuli sagði:

Svo miskunnar [guð] þá þeim, sem hann vill, en forherðir þann, sem hann vill.  (Róm 9:18)

En þú vilt líklega líka "skilja" þetta þannig að guð sé ekki að forherða.  

[Skeggi Skaftason, 20.11.2011 kl. 12:28]

Mofi segir:

Ekki að Allah sé til

Hvað er að heyra þetta, ertu TRÚLEYSINGI ??

[Mofi, 21.11.2011 kl. 09:37]

Hjalti
Mofi, punkturinn minn var sá að guðinn þinn virðist ekki lengur framkvæma kraftaverk sem eru aðgreinanleg frá venjulegum atburðum

Mér finnst þetta auðveldlega aðgreinanlegt frá venjulegum atburði.

Hjalti
Hvernig í ósköpunum eiga örverur og jarðskjálftar að vera "afleiðingar annarra manna"?

Ég myndi ekki segja að örverur og jarðskjálftar vera afleiðing manna, bara svo það komi fram.

[Mofi, 21.11.2011 kl. 09:38]

Skeggi
Hvað er að heyra þetta, ertu TRÚLEYSINGI ??

Nei, ég er líka mjög fórdómafullur gagnvart orðinu trúleysingi. Tel að frekar ætti að tala um meðvitundarleysi þar sem allir sem hafa meðvitund og trúa einhverju varðandi tilvist Guðs, tilgang lífsins og hvað verður um okkur vera fólk sem hefur trú.